Ўтган ҳафта Москвада Россия музокаралар гуруҳи билан Ўзбекистоннинг ЖСТга қўшилишининг қолган масалалари бўйича келишувни илгари суришга бағишланган учрашув бўлиб ўтди, деб хабар берди президентнинг ЖСТ бўйича вакили Азизбек Ўрунов LinkedIn'да.
"Ҳозир музокаралар деярли якунланди: барча муҳим элементлар келишиб олинди ва фақат бир нечта техник жиҳатлар якуний текширув ва тасдиқлашни талаб қилади," - деб ёзди Азизбек Ўрунов.
У иқтисодий ривожланиш вазири Максим Решетников, Савдо музокаралари департаменти директори Екатерина Маёрова, элчи Николай Платонов ва бутун Россия жамоасига "асосий сўровлар бўйича аниқлик, шунингдек, бутун жараён давомида конструктив ҳамкорлик ва қўллаб-қувватлаш учун" миннатдорчилик билдирди.
Ўзбекистон ва Россия якуний натижани жорий йил декабрь ойида Женевада бўлиб ўтадиган Жаҳон савдо ташкилоти Бош кенгаши йиғилишида тақдим этади.
"Шундан сўнг биз фақат Хитой Тайпейи (Тайван) билан икки томонлама музокараларни якунлашимиз керак," - деб ёзди президент вакили.
Қайд этилишича, шу ҳафта Азизбек Ўрунов икки томонлама ҳамкорлик ва ЖСТ доирасидаги ўзаро алоқаларни илгари суриш мақсадида ҳамкасблари билан учрашиш учун Вашингтонда бўлиб турибди.
Изоҳ