Украинанинг Фавқулодда ва мухтор элчиси Никола Дорошенко Ўзбекистондаги дипломатик миссиясини якунламоқда. Бу ҳақда у ўзининг Facebook’даги саҳифасида маълум қилди.
«Украина президенти Владимир Зеленский дипломатик корпус ротацияси доирасида Ўзбекистондаги миссиямни якунлаш тўғрисида қарор қабул қилди. Бу — мамлакатим раҳбарияти, халқим томонидан менга билдирилган энг олий даражадаги ишонч ва мен бу ишончни оқлаш учун қўлимдан келган барча ишни қилдим», — деб ёзди у.
У ўз фаолияти давомида Ўзбекистонда мамлакати манфаатларини ҳимоя қилиш ва ифода этиш шарафига муяссар бўлганини таъкидлади.
«Мен қарзимни адо этдим — бу ҳақиқатни етказишим, Ўзбекистон жамиятига Украинада бугун нима бўлаётганини тушунтиришим керак эди. Умид қиламанки, менинг меҳнатим натижасида ўзбек муҳитида ҳақиқат уруғлари кўпроқ униб чиқади», — дея қўшимча қилди у.
Эслатиб ўтамиз, Никола Дорошенко 2020 йил апрель ойида Украина элчиси этиб тайинланган эди. Ўша йилнинг октябрь ойида у Ўзбекистон президентига “Кўксарой” қароргоҳида ишонч ёрлиқларини топширган.
Изоҳ