Ўзбекистоннинг олтин-валюта захиралари 2025 йилда рекорд даражадаги 66,3 миллиард долларга етиб, йил давомида қарийб 20 миллиард долларга ёки 48,7 фоизга ошди. Бу ҳақда ЎзА мамлакат Марказий банкига таяниб хабар бермоқда.
Захиралар ўсишининг асосий омили олтин қийматининг сезиларли даражада ошиши бўлди - йил давомида у 18,8 миллиард долларга ошди.
Декабрь ойида захираларнинг ўсиши давом этди: бир ой ичида уларнинг ҳажми яна $5,079 млрд га ошди, бу эса навбатдаги рекордни ўрнатиш имконини берди. 2026 йил 1 январь ҳолатига кўра, захира активларининг умумий қиймати 66,3 миллиард долларни ташкил этди - бу мамлакатнинг халқаро захиралари статистикаси эълон қилинганидан бери энг юқори кўрсаткичдир.
Олтиннинг физик ҳажми ҳам 400 минг троя унциясига ошиб, 12,6 миллион троя унциясига етди.
Шу билан бирга, валюта активлари ҳам кўпайди. Хорижий валютадаги захиралар ҳажми 829,1 млн долларга ошиб, 10,6 млрд долларга етди. Марказий банк томонидан сотиб олинган қимматли қоғозлар қиймати 503,3 млн долларга ошиб, 1,5265 млрд долларни ташкил этди.
2025 йил якуни бўйича халқаро захиралар таркибида:
- қимматли қоғозлар $1,531 млрд (+5,3 млн);
- нақд валюта ва депозитлар - $9,112 млрд (+823,9 млн);
- хорижий валютадаги бошқа активлар - $93,9 млн (+21,8 млн), шу жумладан расмий захира активларига кирмайдиган депозитлар - $42,34 млн ва расмий захиралардан ташқари олтин - $51,52 млн.
Марказий банк, шунингдек, олтин-валюта захираларининг ўсиши ва 2025 йилда рекорд даражага етиши Ўзбекистоннинг иқтисодий барқарорлиги ва халқаро молия тизимидаги ўрнини мустаҳкамлашда муҳим аҳамиятга эга эканлигини таъкидлади.
Изоҳ