7 октябрь куни Париждаги резиденцияси билан Монако Князлигидаги Ўзбекистоннинг Фавқулодда ва Мухтор элчиси этиб тайинланган Нодир Ғаниев Князь Альбер II га ишонч ёрлиқларини топширди.
Учрашув чоғида Князь Шавкат Мирзиёев раҳбарлигида Ўзбекистонда амалга оширилаётган ислоҳотларни юқори баҳолади ҳамда мамлакатнинг “яшил энергетика” соҳасидаги лойиҳаларига катта қизиқиш билдирди. Альбер II шунингдек, Ўзбекистоннинг қайта тикланувчи энергия манбаларини ривожлантириш ва 2030 йилгача электр энергиясининг 54 фоизини ана шу манбалардан ишлаб чиқариш мақсадига эришиш йўлидаги саъй-ҳаракатларини алоҳида қайд этди.
Монарх шу йил кузда Самарқандда бўлиб ўтадиган ЮНЕСКОнинг 43-сессияси муносабати билан Ўзбекистонни табриклаб, бу тадбир мамлакатнинг дунёга очиқлигидан дарак беришини таъкидлади.
Эслатиб ўтамиз, икки мамлакат ўртасида дипломатик муносабатлар 2013 йил 29 ноябрда ўрнатилган.
Маълумки, Нодир Ғаниев 2024 йил ноябрь ойида Франциядаги Ўзбекистон элчиси сифатида Президент Эммануэль Макронга ишонч ёрлиқларини топширган. Шу билан бирга, у мамлакатимизни Португалияда ҳам намоён этади.
Изоҳ